Einstök gögn Náttúrustofu Vesturlands um minka, sem hér eru tvinnuð saman við heimildarannsókn, sýna að getan til að greina þekkta nágranna frá óþekktum flökkudýrum er útbreidd meðal óðalsbundinna spendýra og tengist ekki því hvort tegundir séu félagslyndar.

Niðurstöðurnar benda eindregið til þess að jafnvel spendýr sem lifa stök en ekki í hópum eða pörum, hafi ekki síður en félagslynd dýr þróað hæfileikann til að gera greinarmun á einstaklingum. Þessi ályktun er mjög athyglisverð í ljósi þess að oft hefur verið litið sérstaklega á áhrif þess að lifa í hópi til að skýra þróun á vitsmunum dýra. Rannsóknin sýnir þannig fram á nauðsyn þess að líta til margra mismunandi umhverfisþátta og þróunarfræðilegra valkrafta til að skilja vitsmunalega getu núlifandi dýra og hvað liggur á bak við hana.