Ég vil gerast áskrifandi að fréttum NSV
Ef þú vilt gerast áskrifandi að fréttum frá Náttúrustofu Vesturlands skaltu skrá netfangið þitt hér að ofan. Ef þú óskar ekki lengur eftir því að vera í fréttaáskrift, smelltu hér.
27. apríl 2012
Alvarleg skemmdarverk unnin á arnarhreiðri
 |
|---|
Í vikunni vaknaði grunur um að spillt hefði verið fyrir varpi hafarnarhjóna í eyju á sunnanverðum Breiðafirði, því ekki sást lengur til parsins sem vikurnar á undan hafði undirbúið varp og byggt hreiður. Sést hefur til arnanna á þessu svæði undanfarin tvö ár og var fylgst með þeim frá landi frá því þeir sáust fyrst í vor.
Í gær fóru fulltrúar Náttúrustofu Vesturlands og Fuglaverndar í eyjuna til að skoða verksummerki og var aðkoman ófögur. Sýnilegar skemmdir höfðu verið unnar á hreiðrinu með því að róta í því og kasta hluta hreiðurefnanna fram af klettum niður í fjöru. Skemmdirnar eru tvímælalaust af mannavöldum. Ekki er vitað hvort örninn var orpinn þegar þetta átti sér stað en ef svo er, þá voru eggin horfin.
Meira
2. apríl 2012
Hvað étur minkur? – Niðurstöður birtar í alþjóðlegu vísindariti
 |
|---|
Ýmsar tegundir fiska og fugla eru mikilvægasta fæða íslenska minksins samkvæmt niðurstöðum rannsóknar Rannveigar Magnúsdóttur og félaga á Náttúrustofu Vesturlands, Háskóla Íslands og Oxfordháskóla. Skoðað var hvernig fæðan var mismunandi eftir búsvæðum, árstíðum og kyni með því að greina innihald í maga 851 minks sem veiðimenn víða af landinu útveguðu til rannsókna.
Fæðuval var mismunandi eftir því hvort um var að ræða mink við sjávarsíðuna eða við ferskvatn inn til landsins. Við sjóinn voru helstu fæðutegundir grunnsævis- og fjörufiskarnir sprettfiskur, keilubróðir og marhnútur, ásamt öndum, vaðfuglum, fýl, svartfuglum, hagamúsum og hryggleysingjum. Við ferskvatn voru laxfiskar mjög mikilvægir en hornsíli einnig étin, ásamt vaðfuglum, öndum, fýl, hagamúsum o.fl. Fiskar eru stærri hluti fæðu minks hérlendis en í flestum sambærilegum rannsóknum erlendis.
Meira
27. mars 2012
Fyrirlestur SNS í fjarfundarbúnaði: Lífríki íslenskra linda
Fimmtudaginn 29. mars nk. kl. 12:15-12:45 flytur Bjarni K. Kristjánsson erindi sitt: ,,Lífríki íslenskra linda”. Bjarni, sem er prófessor við Háskólann á Hólum, lauk PhD prófi frá háskólanum í Guelph árið 2008. Hann hefur stundað rannsóknir á líffræðilegri fjölbreytni.
Í Stykkishólmi er hægt að fylgjast með erindinu á ráðhúsloftinu og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
22. mars 2012
Sóknarfæri eru í fuglatengdri ferðaþjónustu
Út er komin skýrsla Náttúrustofu Vesturlands og Rannsóknaseturs Háskóla Íslands á Snæfellsnesi um skráningu á fuglalífi á Snæfellsnesi og í Dölum og möguleikum sem felast í fuglatengdri ferðaþjónustu á svæðinu. Snæfellsnes og Breiðafjörður eru rík af fuglalífi og er ljóst að þegar kemur að fuglaskoðun er hér um vannýtta auðlind að ræða.
Fuglaskoðun er ört vaxandi áhugamál í heiminum og er Ísland engin undantekning. Talið er að yfir 150 þúsund innlendir og erlendir ferðamenn hafi skoðað fugla á ferðum sínum um Ísland árið 2008 og er líklegt að umfang fuglatengdrar ferðaþjónustu eigi eftir að aukast verulega á komandi árum. Mörg ónýtt tækifæri eru á þessu sviði til markaðssetningar svæða á Íslandi. Hins vegar er víðast hvar skortur á stöðluðum skráningum fuglalífs sem nýtast við kynningu svæða til fuglaskoðunar. Verkefni Náttúrustofunnar og Háskólasetursins fólst í að bregðast við þessu og útvega upplýsingar sem ferðaþjónustan gæti nýtt sér.
Meira
6. mars 2012
 |
|---|
Laugardaginn 3. mars var haferninum Sigurerni sleppt við Berg í Grundarfirði eftir 8 daga hressingardvöl undir manna höndum. Hann var hinn hressasti og tók strax flugið. Vonandi lifir hann vel og lengi án þess að þarfnast aftur aðstoðar manna. Svo væri ekki verra að hann næði sér í maka!
Meðfylgjandi mynd tók Daníel Bergmann þegar Sigurörn flaug af stað út í frelsið.
Sjá má frétt RÚV um sleppinguna hér.
Meira
27. febrúar 2012
Sigurörn í vandræðum enn á ný
Síðastliðinn föstudag handsamaði Jón Bjarni Þorvarðarson, bóndi á Bergi við vestanverðan Grundarfjörð, hrakinn örn sem ekki náði að hefja sig til flugs. Við nánari skoðun sást að hann var grútarblautur, rétt eins og fálkinn sem náðist við Grundarfjörð tveim dögum fyrr og dvelur nú í Húsdýragarðinum í Reykjavík. Ekki er vitað um uppruna grútsins en mögulega er um síldargrút að ræða.
Við álestur merkisins á fótum arnarins kom í ljós að hér var á ferðinni enginn annar en fjölmiðlastjarnan Sigurörn, sem Sigurborg Sandra Pétursdóttir (þá 12 ára) handsamaði á frækinn hátt við Grundarfjörð árið 2006. Þá var örninn bæði grútarblautur og stélbrotinn en náði skjótt bata og var sleppt á ný.
Meira
24. febrúar 2012
Minkar í fréttum Stöðvar 2
Í gær fjallaði Stöð 2 um rannsóknir Náttúrustofu Vesturlands á minknum. Í viðtali sagði Rannveig Magnúsdóttir stuttlega frá verkefni sínu um fæðuval minksins og greiningum á mögulegum breytingum þess á árunum 2001-2009, auk þess sem komið var inn á niðurstöður stofnstærðarmælingar Náttúrustofunnar á minknum á Snæfellsnesi.
Horfa má á fréttina hér.
22. febrúar 2012
 |
|---|
Síðdegis í gær barst Náttúrustofunni tilkynning um fálka í vanda við suðaustanverðan Grundarfjörð. Feðgarnir Gústav Ívarsson og Gústav Alex Gústavsson höfðu ekið fram á fuglinn, sem greinilega átti í erfiðleikum og náði ekki að hefja sig til flugs. Með lagni tókst þeim að handsama fuglinn og koma fyrir í búri. Fljótt var ljóst að fálkinn hafði lent í grúti en við það missir fiðrið einangrunargildi sitt og fuglinn á erfitt með flug.
Fálkinn, sem var ungfugl, var sóttur í Grundarfjörð og sendur til Reykjavíkur í hreinsun og endurhæfingu í Húsdýragarðinum. Þar verður honum hjúkrað til heilsu á ný af starfsfólki Húsdýragarðsins og Náttúrufræðistofnunar Íslands og vonandi veitt frelsi innan fárra daga.
Meira
20. febrúar 2012
Fyrirlestur SNS í fjarfundarbúnaði: Samanburður breytinga á stofnum lunda og sílis við Ísland og í Norðursjó
Fimmtudaginn 23. febrúar nk. kl. 12:15-12:45 flytur Erpur Snær Hansen, líffræðingur á Náttúrustofu Suðurlands, erindi sitt: ,,Samanburður breytinga á stofnum lunda og sílis við Ísland og í Norðursjó”.
Í Stykkishólmi er hægt að fylgjast með erindinu á ráðhúsloftinu og á Hvanneyri í Landbúnaðarháskólanum (Vesturstofu í Ásgarði).
Sérstaklega er bent á að hægt sé að fylgjast með erindinu í stofu HT-303 í Háskóla Íslands, en ekki í kjallaraherberginu í Odda eins og áður var auglýst.
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
9. febrúar 2012
Fræðsluerindi um náttúrufar og rannsóknir á Bjarnarey
Mánudagskvöldið 13. febrúar mun Hálfdán H. Helgason, líffræðingur, sýna svipmyndir frá Bjarnarey (Bjørnøya) en hann hefur undanfarin sumur stundað þar rannsóknir, einkum á sjófuglum, á vegum Norsk Polarinstitutt (www.npolar.no).
Bjarnarey er 180 ferkílómetra eyja milli Noregs og Svalbarða. Staðsetning hennar við hafstraumaskil gera hana að mikilvægri varpstöð ýmissa sjófuglategunda. Náttúrufar eyjarinnar er um margt sérstakt og hafa gríðarlegar auðlindir á og við hana orsakað milliríkjadeilur. Fjallað verður um eyjuna í máli og myndum og rannsóknir sem þar eru stundaðar.
Erindið, sem haldið er á vegum Rannsóknaseturs HÍ á Snæfellsnesi og Náttúrustofu Vesturlands, verður á ráðhúsloftinu, Hafnargötu 3 í Stykkishólmi.
Aðgangur ókeypis og allir velkomnir.
24. janúar 2012
Fyrirlestur SNS í fjarfundarbúnaði: Hópatferli andarunga
Fimmtudaginn 26. janúar nk. kl. 12:15-12:45 flytur Rán Þórarinsdóttir, líffræðingur á Náttúrustofu Austurlands, erindi sitt: ,,Hópatferli andarunga”.
Í Stykkishólmi er hægt að fylgjast með erindinu á ráðhúsloftinu og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
19. janúar 2012
Til hamingju Snæfellingar
Eins og vonandi allir vita hafa sveitarfélögin á Snæfellsnesi státað sig af umhverfisvottun á starfsemi sinni frá árinu 2008 og hefur starfsmaður verkefnisins verið vistaður á Náttúrustofu Vesturlands. Til þess að viðhalda slíkri vottun er krafist vöktunar á auðlindanýtingu og ýmsum umhverfisþáttum auk stöðugra úrbóta í umhverfis- og samfélagsmálum. Árlega er starfsemin tekin út af óháðum aðila vegna endurnýjunar á vottun. Rétt fyrir jólin kom á svæðið úttektaraðili, Haukur Haraldsson frá Almennu verkfræðistofunni, til þess að fara yfir vinnu síðasta árs og meta svæðið með mögulega endurnýjun á vottun í huga. Þann 16. janúar sendu svo EarthCheck vottunarsamtökin tilkynningu um að vottun hefði náðst fyrir árið 2012.
Nú skartar Snæfellsnes því nýju merki fyrir árið 2012. Til hamingju Snæfellingar!
Með þessu hefur grunnur verkefnisins verið treystur enn frekar. Framtíðarsýn verkefnisins er sterk hvað varðar fjölbreytt verkefni, kynningarstarf og mögulega útvíkkum til fleiri sveitarfélaga, meira um það síðar.
Meira
17. janúar 2012
Gríðarlegt fuglalíf við Snæfellsnes
_stor.jpg)
Nú er lokið árlegri talningu vetrarfugla
sem fer fram í kringum áramót. Á talningarsvæðunum á norðanverðu Snæfellsnesi voru nú samtals tæplega 29 þúsund fuglar af 39 tegundum. Fuglalífið
var óvenju blómlegt vegna mikillar síldargengdar í Breiðafirði fjórða veturinn
í röð og sáust nú enn fleiri fuglar en áður.
Á meðal þess sem mesta athygli vekur er gríðarlegur fjöldi máfa, súlna og annarra fiskiætna. Algengustu tegundirnar voru svartbakur, æðarfugl og hvítmáfur en máfar, æður, súla og fýll voru samtals ríflega 80% af heildarfjölda. Samtals sáust 16 hafernir, fleiri en nokkru sinni fyrr.
Meira
21. desember 2011
Jólakveðja frá Náttúrustofu Vesturlands
Starfsfólk Náttúrustofu Vesturlands óskar samstarfsfólki, viðskiptavinum, velunnurum, Vestlendingum og landsmönnum öllum gleðilegra jóla og farsældar á komandi ári.
Smellið á myndina fyrir neðan til að sjá hana stærri.
16. desember 2011
Úttekt á sveitarfélögunum á Snæfellsnesi
Starfsemi sveitarfélaganna fimm á Snæfellsnesi hefur frá árinu 2008 borið umhverfisvottunina EarthCheck, sem merki um vinnu sína að sjálfbærari starfsháttum. Vottunin var endurnýjuð eftir úttekt árið 2010 og nú var komið að næstu úttekt. Haukur Haraldsson, gæðastjóri Almennu verkfræðistofunnar framkvæmdi úttektina fyrir hönd EC3 Global, eiganda EarthCheck.
Haukur fór yfir gögn sveitarfélaganna um auðlindanýtingu, umhverfisstjórnunarhandbók og fleira
í úttekt sinni með aðstoð Theódóru Matthíasdóttur, umhverfisfulltrúa sveitarfélaganna og starfsmanni Náttúrustofunnar, og Stefáni Gíslasyni, umhverfisstjórnunarfræðingi hjá Environice. Haukur mun í framhaldinu skila skýrslu til EC3 Global, þar sem fram kemur hvort sveitarfélögin hafi uppfyllt þau skilyrði sem sett eru fyrir endurnýjun vottunar en spennandi verður að heyra hvort sveitarfélögin á svæðinu standist úttektina og verði þannig áfram í forystu íslenskra sveitarfélaga í umhverfismálum.
Meira
25. nóvember 2011
Fyrirlestur um fuglalíf á utanverðu Snæfellsnesi
Mánudaginn 28. nóvember nk. kl. 20 flytur Ellen Magnúsdóttir líffræðingur fyrirlestur um fuglalíf í Þjóðgarðinum Snæfellsjökli.
Ellen fer yfir helstu tegundir fugla sem halda
til í og við þjóðgarðinn og hvaða tegundir má búast við að sjá á hvaða stöðum.
Fyrirlesturinn verður haldinn á Ráðhúsloftinu
í Stykkishólmi.
Aðgangur er ókeypis og allir velkomnir!
Smellið á myndina hér til hægri til að sjá
frekari upplýsingar.
Meira
23. nóvember 2011
Fyrirlestur SNS í fjarfundarbúnaði: Hópatferli andarunga
Fimmtudaginn 24. nóvember nk. kl. 12:15-12:45 flytur Rán Þórarinsdóttir, líffræðingur á Náttúrustofu Austurlands, erindi sitt: ,,Hópatferli andarunga”.
Í Stykkishólmi er hægt að fylgjast með erindinu á ráðhúsloftinu og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
16. nóvember 2011
Náttúrustofa og Háskólasetur kynntu niðurstöður rannsókna á Líffræðiráðstefnunni 2011
Dagana 11. og 12. nóvember síðastliðinn hélt Líffræðifélag Íslands veglega ráðstefnu um íslenskar líffræðirannsóknir í Öskju og Íslenskri erfðagreiningu (http://lif.gresjan.is/2011/). Rannsóknir voru kynntar í 84 erindum og á 77 veggspjöldum. Náttúrurannsóknastofnanirnar
í Stykkishólmi, þ.e. Náttúrustofa Vesturlands og Rannsóknasetur Háskóla Íslands á Snæfellsnesi (Háskólasetur Snæfellsness),
létu ekki sitt eftir liggja og kynntu hluta af rannsóknum sínum í fjórum erindum og á fimm veggspjöldum, m.a. um minka, refi, æður, glókoll, dílaskarf, lunda og fuglaskoðun. Hér
að neðan eru fyrirsagnir framlaga í stafrófsröð og ef smellt er á hlekkinn fyrir aftan þær
birtast útdrættir um hverja rannsókn fyrir sig og upplýsingar um höfunda. Einnig má skoða veggspjöldin í heild sinni.
Meira
1. nóvember 2011
Bíll Náttúrustofunnar til sölu
Náttúrustofa Vesturlands er með til sölu
Toyota Hilux bifreið, árgerð 1994, dísel, dökkblár, 83 hestöfl, 2446 cc, beinskiptur. Ekinn 256.330 km.
Gott eintak sem þarfnast smávægilegra viðgerða. Vetrardekk á felgum fylgja með.
Verð 250.000 kr.
Hægt er að fá frekari upplýsingar á Náttúrustofunni í síma 433-8121 eða 698-1003. Einnig er hægt að senda tölvupóst á
palmi@nsv.is.
Meira
19. október 2011
Náttúrustofuþing 2011 í Neskaupstað
Náttúrustofuþing 2011 verður haldið í Neskaupstað miðvikudaginn 26. október næstkomandi. Þar gefst gestum tækifæri
til að hlýða á fjölbreytt erindi starfsmanna náttúrustofa og gestafyrirlesara.
Náttúrustofur eru sjö talsins, dreifðar vítt
og breitt um landið. Þær mynda með sér Samtök náttúrustofa, sem er samstarfs- og samráðsvettvangur þeirra. Frá árinu 2005
hafa náttúrustofurnar skipst á að halda ráðstefnu haust hvert í tengslum við
aðalfund samtakanna. Að þessu sinni er gestgjafinn Náttúrustofa Austurlands.
Dagskrá ráðstefnunnar má nálgast með því
að smella á myndina hér til hægri.
Meira
11. október 2011
Pólverjar sækja í smiðju Íslendinga varðandi þekkingu á mink
|
Nýverið sótti pólskur minkasérfræðingur Náttúrustofuna heim í þeim tilgangi að
afla gagna um rannsóknir, löggjöf, veiðistjórnun, veiðar og ræktun minka
á Íslandi. Um var að ræða líffræðinginn
Jakub Skorupski, sem starfar við
Tækniháskóla Vestur-Pommern í
Szczecin í Póllandi og er jafnframt verkefnastjóri hjá samtökunum Baltic Green Belt. Þekkinguna sem Jakub aflaði mun hann nýta til að stuðla að bættum aðgerðum gegn minkum í Póllandi.
Náttúrustofa Vesturlands var opinber gestgjafi og tengiliður í heimsókn hans til landsins. Starfsfólk stofunnar kynnti Jakub helstu niðurstöður íslenskra minkarannsókna og aðstoðaði hann einnig við skipulag ferðarinnar og að komast í samband við lykilaðila varðandi minkinn á Íslandi, þ.e. rannsóknafólk, fulltrúa stjórnsýslunnar, veiðimenn, minkabændur o.fl.
Meira
5. október 2011
Skýrsla um starfsemi Náttúrustofu Vesturlands komin út
Út er komin skýrsla um starfsemi Náttúrustofu Vesturlands á árunum 2007-2010. Skýrslan
er 32 síður og ríkulega myndskreytt. Eins og sjá má af skýrslunni var starfsemin fjölbreytt
á tímabilinu en eins og áður fór mest fyrir rannsóknum, fræðslu, ráðgjöf og ýmsum störfum í tengslum við umhverfismál.
Skýrslunni var fyrst dreift í afmælisfagnaði Náttúrustofunnar síðastliðinn sunnudag en
á næstunni verður henni dreift til helstu
samstarfsaðila. Að auki mun hún næstu
daga liggja frammi á Olísstöðinni (Bensó)
og í afgreiðslu ráðhússins í Stykkishólmi. Áhugasamir geta óskað eftir að fá sent eintak með því að senda póst á netfangið palmi@nsv.is eða hringt í s. 433 8121. Einnig
er bent á umhverfisvænni leið sem er að lesa hana með því að smella á myndina hér til hægri.
Meira
5. október 2011
Myndir úr afmælisveislu
Hátt í hundrað manns mættu í afmælisfagnað Náttúrustofu Vesturlands, sem haldinn var sunnudaginn 2. október. Starfsfólk Náttúrustofunnar kynnti starfsemina og opnaði húsakynnin til skoðunar. Virtust gestir skemmta sér hið besta og má sjá nokkra afmælisgesti á meðfylgjandi myndum Þorsteins Eyþórssonar. Starfsfólk Náttúrustofunnar þakkar gestum kærlega fyrir komuna og stuðning þeirra við starfsemina.
 Róbert kynnir starfsemi Náttúrustof- unnar fyrir gestum |
 Símon og Róbert kryfja mink |
 Gretar D. Pálsson, stjórnarmaður í Náttúrustofu Vesturlands, sker fyrstu sneiðina af afmæliskökunni |
 Menja segir frá notkun erfðarannsókna- búnaðar |
27. september 2011
Afmælisfagnaður Náttúrustofu Vesturlands
Nýlega voru 10 ár liðin frá því að þáverandi umhverfisráðherra, Siv Friðleifsdóttir, opnaði Náttúrustofu Vesturlands með formlegum
hætti á fallegum sumardegi, 28. júní. Að því tilefni standa dyr Náttúrustofunnar opnar sunnudaginn 2. október nk. og býður
starfsfólkið íbúum Vesturlands og
öðrum velunnurum að kynna sér starfsemina og fagna þessum áfanga.
Starfsemi Náttúrustofunnar hefur frá upphafi verið fjölbreytt en rannsóknir á náttúru landshlutans hafa skipað stærstan sess í starfseminni, auk ýmiss konar fræðslu- og ráðgjafarverkefna. Á næstu dögum kemur
út skýrsla um starfsemi Náttúrustofunnar á árunum 2007-2010 en þar getur að líta gott yfirlit um það sem helst hefur drifið á daga starfsfólksins undanfarin ár.
Dagskráin á sunnudaginn stendur frá kl. 13-16. Í upphafi verður flutt erindi þar sem farið verður yfir sögu stofunnar og helstu verkefni hennar á síðasta áratug en kl. 14-15 verður gestum boðið að ganga um húsnæði Náttúrustofunnar og fræðast frekar um starfsemina, t.d. skoða rannsóknarstofur og fylgjast með krufningu minks. Að lokum verður boðið upp á léttar veitingar. Náttúrustofan er til húsa í ráðhúsi Stykkishólms og eru allir velkomnir á sunnudaginn. Nánari upplýsingar um dagskrána má finna hér.
Meira
12. september 2011
Umhverfisvottað Vesturland
Ráðstefna í Hjálmakletti, mennta- og menningarhúsi Borgarbyggðar í Borgarnesi
Fimmtudaginn 22. september standa Framkvæmdaráð Snæfellsness, Náttúrustofa Vesturlands og Borgarbyggð fyrir ráðstefnu
um umhverfismál og umhverfisvottanir.
Starfsemi sveitarfélaganna á Snæfellsnesi
er umhverfisvottuð samkvæmt staðli samtakanna EarthCheck. Í fyrrahaust var samþykkt ályktun á aðalfundi Samtaka sveitarfélaga á Vesturlandi um að skoða umhverfisvottun fyrir Vesturland allt með Snæfellsnes sem fyrirmynd. Tilgangur ráðstefnunnar er að fjalla um stöðu umhverfismála og kynna þessa hugmynd.
Bent verður á mikilvægi umhverfisverndar og hvað hægt sé að gera til þess að sporna
gegn þeirri neikvæðu þróun sem átt hefur
sér stað síðustu áratugi. Sérstaklega verður skoðað hversu stórt hlutverk sveitarfélög
leika þegar kemur að umhverfismálum.
Meira
26. ágúst 2011
Arnarvarp gekk betur en óttast var
Varp margra fugla gekk óvenju illa sumarið 2011 vegna fæðuskorts og slæms tíðarfars. Haförninn átti sömuleiðis í nokkrum
vandræðum en þó gekk arnarvarp vonum framar því 29 ungar komust á legg úr 19 hreiðrum. Varpárangur þar sem varpið heppnaðist var mjög góður og komust nú þrír ungar á legg úr einu hreiðri, sem er afar sjaldgæft. Varpið gekk í meðallagi vel við Faxaflóa en illa við norðanverðan Breiðafjörð
og á Vestfjörðum.
Náttúrufræðistofnun Íslands vaktar arnarstofninn í samvinnu við Fuglaverndarfélag Íslands, Náttúru Vesturlands og Náttúrustofu Vestfjarða. Nánar er fjallað um arnarvarpið 2011 á heimasíðu Náttúrufræðistofnunar Íslands.
Meira
26. ágúst 2011
Bjarnarkló er garðplanta sem vert er að varast
Bjarnarkló hefur á síðustu dögum fengið talsverða umfjöllun hjá Ríkisútvarpinu, þar á meðal í Landanum, fréttum og á heimasíðu,
en bjarnarkló er einmitt ein þeirra fjögurra plöntutegunda sem samvinnuverkefni Stykkishólmsbæjar og Náttúrustofu Vesturlands beinist að.
Umfjöllun RÚV hófst með vandaðri samantekt Sigríðar Halldórsdóttur,
þar sem hún fór yfir eiginleika bjarnarklóar og þá slysahættu sem hún skapar. Var þar m.a. rætt við
íbúa í Stykkishólmi sem hlaut brunasár eftir viðureign við bjarnarkló. Degi síðar birtist viðvörun við bjarnarkló á heimasíðu Landans og Morgunútvarp Rásar 2 fjallaði um sama efni, þar sem rætt var við starfsmann Náttúrustofu Vesturlands, Menju von Schmalensee.
Meira
28. júní 2011
Í dag eru tíu ár liðin síðan
Siv Friðleifsdóttir, þáverandi umhverfisráðherra, vígði Náttúrustofu Vesturlands
með formlegum hætti. Við opnunina tóku ýmsir til máls
og var andrúmsloftið hlaðið jákvæðni og bjartsýni sem fylgt hefur starfseminni síðan.
Á þessum fyrsta áratug hefur starfsfólk Náttúrustofunnar unnið að fjölbreyttum náttúrutengdum verkefnum með rannsóknum, fræðslu og ráðgjöf. Að baki eru um 38 ársverk eða tæplega fjögur stöðugildi að jafnaði. Samstarf við kollega, sveitarfélög, stofnanir og stjórnvöld hefur verið farsælt og stuðlað að aukinni þekkingu og vonandi betra samfélagi.
Í september verður 10 ára afmælinu fagnað með pompi og prakt, þar sem boðið verður upp á opið hús og dagskrá fyrir alla fjölskylduna. Afmælishátíðin verður auglýst þegar nær dregur.
Starfsfólk þakkar samfylgdina og stuðninginn þennan fyrsta áratug!
Meira
16. maí 2011
Fuglafréttir
Fjölbreytt fuglalíf
Í sumar mun líffræðineminn Arnór Þrastarson afla upplýsinga um fuglalíf á Snæfellsnesi og í Dölum og koma þeim á form sem nýtist fuglaskoðurum ogferðaþjónustuaðilum. Um er að ræða samstarfsverkefni Náttúrustofunnar (NSV) og Háskólaseturs Snæfellsness (HS), sem styrkt er af Nýsköpunarsjóði.
Gangaöflun hófst í síðustu viku þegar starfsmenn NSV og HS skoðuðu fugla á öllu svæðinu. Samtals sást 61 fuglategund í athugunum þessa tvo daga, sumar þeirra aðeins í einu eintaki en aðrar í þúsundatali. Að auki hafa á síðustu dögum sést a.m.k. þrjár tegundir varpfugla og aðrar tvær tegundir flækingsfugla á svæðinu, sem ekki komu fram í talningunni. Á tegundalista Snæfellsness og Dala eru nú m.a. flækingsfuglarnir mandarínönd, skutulönd, landsvala og bjarthegri, fargestirnir rauðbrystingur, margæs, tildra og sanderla og sjaldgæfir varpfuglar á borð við skeiðönd, grafönd, flórgoða og haförn.
Meira
16. maí 2011
Íbúafundur í Grundarfirði vegna umhverfisvottunar
Í kvöld, mánudaginn 16. maí verður efnt til íbúafundar í Grundarfirði um umhverfisvottun EarthCheck sem sveitarfélagið hefur hlotið í samstarfi við hin sveitarfélögin á Snæfellsnesi. Sambærilegir fundir hafa verið haldnir á síðustu vikum í Stykkishólmi og Snæfellsbæ.
Nánari upplýsingar má sjá með því að smella á meðfylgjandi auglýsingu.
4. maí 2011
Íbúafundur í Snæfellsbæ vegna umhverfisvottunar
Miðvikudaginn 11. maí verður efnt til íbúafundar í Snæfellsbæ um umhverfisvottun EarthCheck sem sveitarfélagið hefur hlotið í samstarfi við hin sveitarfélögin á Snæfellsnesi. Í síðustu viku var haldinn sambærilegur fundur í Stykkishólmi og fljótlega verður einnig boðað til fundar í Grundarfirði.
Nánari upplýsingar má sjá með því að smella á meðfylgjandi auglýsingu.
4. maí 2011
Síðastliðinn laugardag fór fram gríðarlega vel heppnuð og fjölsótt vísindaveisla í Stykkishólmi. Atburðurinn var haldinn í samstarfi Háskólalestar Háskóla Íslands og
W-23 hópsins á Snæfellsnesi.
W-23 hópurinn á Snæfellsnesi samanstendur af Náttúrustofu Vesturlands, Háskólasetri Snæfellsness, útibúi Hafrannsóknastofnun- arinnar í Ólafsvík, Vör Sjávarrannsóknarsetri við Breiðafjörð og Þjóðgarðinum Snæfellsjökli. Hópurinn hefur tvisvar haldið vísindavöku fyrir almenning, haustið 2008 í Grundarfirði og haustið 2009 í Ólafsvík, og var röðin nú komin að Stykkishólmi. Þegar fréttist af komu Háskólalestarinnar var ákveðið að slá vísindavökunni saman við heimsókn lestarinnar og kalla atburðinn Vísindaveislu. Um morguninn leiddu starfsmenn Náttúrustofunnar og Háskólasetursins fuglaskoðun í Stykkishólmi en formleg dagskrá á Hótel Stykkishólmi hófst á hádegi. Fjölmargt áhugavert var í boði og virtist fólk skemmta sér hið besta. A.m.k. var eftir því tekið að margir gestanna dvöldu í veislunni allan tímann eða frá kl. 12-16.
Meira
27. apríl 2011
Íbúafundur í kvöld vegna umhverfisvottunar
Í kvöld miðvikudaginn 27. apríl kl 20 verður efnt til íbúafundar um umhverfisvottun EarthCheck sem Stykkishólmsbær hefur hlotið í samstarfi við hin sveitarfélögin á Snæfellsnesi. Í maí verða sambærilegir fundir í Grundarfirði og Snæfellsbæ.
Nánari upplýsingar má sjá með því að smella á meðfylgjandi auglýsingu.
26. apríl 2011
Vísindaveisla í Stykkishólmi 30. apríl 2011
Laugardaginn 30. apríl býður W23-hópurinn ásamt Háskólalestinni til Vísindaveislu á
Hótel Stykkishólmi. Dagskráin hefst með fuglaskoðun í Stykkishólmi kl. 10:30, en
hist verður við ráðhúsið. Dagskránni er
síðan haldið áfram á Hótel Stykkishólmi frá
kl. 12-16. Margt áhugavert verður á boðstólum. Aðgangur er ókeypis og eru allir velkomnir. Nánari upplýsingar má sjá með
því að smella á meðfylgjandi auglýsingu.
W23 er heiti samstarfs náttúrutengdra stofnana á Snæfellsnesi. Stofnanirnar eru Náttúrustofa Vesturlands, Háskólasetur Snæfellsness, Vör Sjávarrannsóknarsetur, útibú Hafrannsóknastofnunarinnar í Ólafsvík og Þjóðgarðurinn Snæfellsjökull.
Háskólalestin heimsækir Stykkishólm í tilefni
af 100 ára afmæli Háskóla Íslands.
Meira
11. apríl 2011
Aðgerðir gegn ágengum plöntum í Stykkishólmi 2010
Sumarið 2010 var ráðist í aðgerðir gegn ágengum plöntum í Stykkishólmsbæ í samstarfi sveitarfélagsins og Náttúrustofu Vesturlands. Aðgerðir gengu vel og er áformað að halda þeim áfram sumarið 2011. Í þessum pistli er farið stuttlega yfir gang verkefnisins fyrsta sumarið.
Stykkishólmsbær var fyrsta íslenska sveitarfélagið
til að hefja aðgerðir gegn ágengum plöntum sem ná
yfir allt sveitarfélagið. Aðdragandi málsins er sá að
haustið 2007 fékk Stykkishólmsbær Náttúrustofu Vesturlands til liðs við sig til að gera úttekt á
ágengum plöntutegundum í landi sveitarfélagsins í kjölfar athugasemda frá íbúum. Haustið 2009 kom út skýrslan, Ágengar plöntur í Stykkishólmi sem fjallar um útbreiðslu fjögurra tegunda sem eru eða gætu orðið ágengar í bæjarlandinu, þ.e. alaskalúpínu, skógarkerfils, spánarkerfils og bjarnarkló, og mögulegar aðgerðir gegn þeim. Land Stykkishólmsbæjar er um 10 km2 og var alaskalúpína allútbreidd á svæðinu en skógarkerfill og spánarkerfill mynduðu hér og þar litlar breiður en oftast var um stakar eða fáar plöntur að ræða. Bjarnarkló fannst á fáeinum stöðum.
Meira
4. apríl 2011
Heimildaskrá um Hvalfjarðarsveit
Náttúrustofa Vesturlands hefur nú lokið við að taka saman lista yfir heimildir sem fjalla um náttúrufar í Hvalfjarðarsveit, að beiðni sveitarfélagsins. Auk þess að gera slíkan lista voru teknar saman í möppur þær heimildir sem voru aðgengilegar, ef frá eru taldar bækur og önnur rit lengri en 50 bls.
Listi af þessu tagi verður seint tæmandi, enda eru margar af þessum heimildum því miður alldjúpt grafnar og flestum gleymdar þótt það segi ekki endilega til um gæði þeirra. Aðrar eru aðgengilegar t.d. á netinu. Sífellt bætist við listann en vonast er til að hann endurspegli engu að síður vel úrval ritaðra heimilda um náttúrufar Hvalfjarðarsveitar fram til ársins 2010. Samtals eru á listanum 322 heimildir. Á Náttúrustofunni (nsv@nsv.is) er tekið við ábendingum um heimildir sem ekki eru á listanum.
Heimildaskrána má nálgast hér.
Meira
28. mars 2011
Fyrirlestur SNS í fjarfundarbúnaði: Er úrgangur frá fiskeldi vandamál?
Fimmtudaginn 31. mars nk. kl. 12:15-12:45 flytur Þorleifur Eiríksson, líffræðingur á Náttúrustofu Vestfjarða, erindi sitt: ,,Er úrgangur frá fiskeldi vandamál?”.
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
8. mars 2011
Ráðstefna um árangur minkaveiðiátaks
Umhverfisráðuneytið stóð fyrir átaki í minkaveiðum á Snæfellsnesi og við Eyjafjörð
árin 2007-2009. Umsjónarnefnd með minkaveiðiátaki boðar til ráðstefnu um árangur átaksins, rannsóknir og framtíðarsýn um fyrirkomulag minkaveiða í ljósi þeirra upplýsinga sem verkefnið hefur dregið fram. Ráðstefnan verður haldin á Grand Hótel, 14. mars 2011,
kl. 13-16.
Markmið minkaveiðiátaksins 2007-2010 var staðbundin útrýming minks í Eyjafirði og á Snæfellsnesi. Veiðiálag var aukið og samhliða
var unnið að rannsóknum til þess að meta árangur af því og leita svara við þeirri spurningu hvort mögulegt væri að útrýma mink á landsvísu. Merkjanlega góður og skjótur árangur náðist í Eyjafirði. Hægar gekk að fækka mink á Snæfellsnesi, en þar hefur þó einnig orðið veruleg fækkun.
Meira
22. febrúar 2011
Forðabúr fjörunnar - Málþing um matþörunga
Matís, Hafrannsóknastofnunin og Náttúrustofa Vesturlands boða til fundar um matþörunga til að
ræða þau tækifæri og möguleika sem eru til nýtingar á þeim á Íslandi. Markmið málþingsins er að vekja áhuga og fá fram hugmyndir að aðgerðum/verkefnum sem stuðla að framþróun í nýtingu á matþörungum hér við land. Málþingið er opið öllum, hvort sem um er að ræða fyrirtæki sem eru í vinnslu á matþörungum eða hafa
hug á því, kaupendur á matþörungum eða
áhugasaman almenning.
Má finna ónýtt tækifæri til verðmætasköpunar í matþörungum á Íslandi?
Aukins áhuga gætir hér á landi á nýtingu matþörunga en á heimsvísu er verslun og nýting þeirra mikil og sívaxandi. Þörunga má nýta beint til matargerðar og úr þeim má einnig vinna ýmsar afurðir sem nýttar eru í matvælaiðnaði, landbúnaði, iðnaði, snyrtivöruiðnaði, læknisfræði, til framleiðslu lífvirkra efna og margt fleira.
Meira
22. febrúar 2011
Fimmta laugardaginn í röð heldur Haraldur Sigurðsson, jarðfræðingur og ævintýramaður með meiru, áhugaverðan fyrirlestur á Eldfjallasafninu í Stykkishólmi. Að þessu sinni fjallar Haraldur um rannsóknir sínar á loftsteinsárekstri í Mexíkó og útdauða lífríkis á jörðu fyrir 65 miljónum ára.
Fyrirlesturinn verður á Eldfjallasafninu næstkomandi laugardag, 26. febrúar kl. 13. Sjá einnig meðfylgjandi auglýsingu.
Meira
22. febrúar 2011
Fyrirlestur SNS í fjarfundarbúnaði: Komur amerískra flækingsfugla til landsins
Fimmtudaginn 24. febrúar nk. kl. 12:15-12:45 flytur Yann Kolbeinsson, líffræðingur á Náttúrustofu Norðausturlands, erindi sitt: ,,Komur amerískra flækingsfugla til landsins”.
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
17. febrúar 2011
Fjórða laugardaginn í röð heldur Haraldur Sigurðsson, jarðfræðingur og ævintýramaður með meiru, áhugaverðan fyrirlestur á Eldfjallasafninu í Stykkishólmi. Að þessu sinni fjallar Haraldur um leyndardóma Kerlingarfjalls í Helgafellssveit.
Fyrirlesturinn verður á Eldfjallasafninu næstkomandi laugardag, 19. febrúar kl. 13. Sjá einnig meðfylgjandi auglýsingu.
Meira
17. febrúar 2011
Undanfarið hafa fregnir borist af fjölda hvala
og fugla í Grundarfirði og Kolgrafafirði á norðanverðu Snæfellsnesi. Þar eru máfar og fýlar í þúsundatali ásamt öðrum sjófuglum,
s.s. súlu. Af hvölum hafa háhyrningar verið mest áberandi en einnig hefur sést til höfrunga, hrefnu og hnísu. Svo virðist sem þetta fjöruga lífríki í og ofan sjávarborðs endurspegli síldargöngur á svæðinu.
Starfsfólk Náttúrustofunnar leit til hvala frá ströndinni í hægu en þungbúnu veðri þegar langt var liðið á gærdaginn og fylgja hér til gamans fáeinar myndir sem teknar voru frá landi á svæðinu frá Hellnafelli að Grundarfjarðarhöfn. Allar myndirnar eru af einum hópi 7 háhyrninga, væntanlega fjölskyldu, sem synti meðfram ströndinni frá vestri til austurs. Fleiri háhyrningar sáust utar á firðinum og telja sjómenn á svæðinu að mest hafi verið hundruð hvala í firðinum undanfarna daga.
Meira
9. febrúar 2011
Þriðja laugardaginn í röð heldur Haraldur Sigurðsson, jarðfræðingur og ævintýramaður með meiru, áhugaverðan fyrirlestur á Eldfjallasafninu í Stykkishólmi. Að þessu sinni fjallar Haraldur um stærstu eðlur jarðar, Komododrekana.
Fyrirlesturinn verður á Eldfjallasafninu næstkomandi laugardag, 12. febrúar kl. 13. Sjá einnig meðfylgjandi auglýsingu.
Meira
24. janúar 2011
Fyrirlestur SNS í fjarfundarbúnaði: Framandi og ágengar tegundir á Íslandi
Fimmtudaginn 27. janúar, kl. 12:15 - 12:45, flytur Menja von Schmalensee, líffræðingur á Náttúrustofu Vesturlands, erindi sitt ,,Framandi og ágengar tegundir á Íslandi".
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
21. janúar 2011
Miðvikudaginn 26. janúar kl 20 fjalla Erpur Snær Hansen, líffræðingur hjá Náttúrustofu Suðurlands, og Árni Ásgeirsson, Hólmari og líffræðinemi við Háskóla Íslands, um lundarannsóknir sínar.
Fyrirlestur Erps nefnist ,,Aldurssamsetning, veiði, viðkoma og stofnstærð lunda", og fyrirlestur Árna ,,Varpvistfræði lunda og endurheimt gamalla lundavarpa með tálfuglum í eyjum á suðursvæði Breiðafjarðar".
Fyrirlestrarnir eru á vegum Náttúrustofu Vesturlands og Háskólaseturs Snæfellsness og verða haldnir á ráðhúsloftinu í Stykkishólmi . Aðgangur er ókeypis og allir velkomnir!
Meira
12. janúar 2011
Nú er lokið árlegri talningu vetrarfugla sem fer fram í kringum áramót. Á talningarsvæðunum á Snæfellsnesi voru nú samtals 20.719 fuglar af 35 tegundum. Fuglalífið var óvenju blómlegt líkt og síðasta vetur, að líkindum vegna mikillar síldargengdar í Breiðafirði þriðja veturinn í röð. Algengustu tegundirnar voru hvítmáfur, svartbakur og æðarfugl með samtals ríflega 80% af heildarfjölda. Miðað við áætlaða stofnstærð hvítmáfs og svartbaks sást á þessu svæði talsverður hluti landsstofns þessara tegunda. Auk þess kom þarna fram mikilvægur hluti vetrarstofns tjalds á landinu. Athygli vakti að engar álftir sáust að þessu sinni en undanfarin ár hafa nokkrar álftir haldið til allan veturinn í Álftafirði og nágrenni.
Meira
22. desember 2010
Jólakveðja frá Náttúrustofu Vesturlands
Starfsfólk Náttúrustofu Vesturlands óskar samstarfsfólki, viðskiptavinum, velunnurum, Vestlendingum og landsmönnum öllum gleðilegra jóla og farsældar á komandi ári.
Smellið á myndina fyrir neðan til að sjá hana stærri.
20. desember 2010
Tvær nýjar yfirlitsgreinar um ágengar tegundir birtar í Náttúrufræðingnum
 |
 |
|---|
Í síðustu viku birtist í Náttúrufræðingnum, tímariti Hins íslenska náttúrufræðifélags (HÍN), seinni greinin af tveim um ágengar tegundir eftir Menju von Schmalensee, sviðsstjóra á Náttúrustofu Vesturlands. Fyrri greinin birtist í næsta tölublaði á undan, sem út kom í sumar.
Ágengar tegundir eins og lúpína og minkur hafa verið fyrirferðarmiklar í umræðu landsmanna síðustu áratugi en í greinunum tveim er litið á ágengar tegundir í stóru samhengi. Í þeirri fyrri er fjallað almennt um líffræði þeirra og stöðu á heimsvísu en sjónum beint að stöðu mála á Íslandi í seinni greininni.
Meira
13. desember 2010
Skýrsla um gróðurfar í Húsafelli og Geitlandi
Út er komin skýrslan „Gróðurfarsúttekt á
Húsafellsskógi og Geitlandi 2010“,sem Björn Þorsteinsson og Anna Guðrún Þórhallsdóttir unnu
fyrir Náttúrustofu Vesturlands. Rannsóknin var unnin að beiðni Umhverfisstofnunar.
Mældur var þéttleiki og hæð birkis í friðlandinu í Húsafelli í Borgarfirði og þær niðurstöður bornar
saman við eldri rannsóknir (1981 og 2002). Ástand gróðurs í friðlandinu í Geitlandi, sem er skammt frá Húsafelli, var metið á tveimur völdum svæðum. Höfundar lýstu gróðurfari og settu fram ráðleggingar um landnotkun.
Rannsóknin var hluti af viðleitni Umhverfisstofnunar
til að bæta þekkingu og grundvöll stjórnunar á friðlýstum svæðum. Skýrsluna má nálgast á
Náttúrustofu Vesturlands eða með því að smella á
forsíðumyndina hér til hægri.
Meira
3. desember 2010
Mikill áhugi á EarthCheck verkefninu
Greinilegur áhugi er fyrir EarthCheck umhverfisvottun sveitarfélaganna á Snæfellsnesi, bæði innanlands og utan. Verkefnið var kynnt á umhverfisráðstefnu sem haldin var á vegum SEEDS sjálfboðaliðasamtakanna í nóvember og vakti mikla athygli meðal ráðstefnugesta. Þar var íbúum Snæfellsness klappað lof í lófa fyrir að
vera í forystu í sjálfbærnimálum sveitarfélaga á Íslandi.
Á grundvelli þess að Snæfellsnes væri fyrirmynd annarra samfélaga fyrir þau skref sem hafa verið tekin í átt að sjálfbærara samfélagi og þátttöku íbúa í að minnka vistspor sveitarfélaganna var fulltrúa EarthCheck verkefnisins boðið að halda kynningu á EarthCheck og sorpmálum Stykkishólmsbæjar á fyrrnefndri ráðstefnu sem haldin var í tilefni af fimm ára afmæli SEEDS sjálfboðaliðasamtakanna. Ráðstefnan var haldin í Iðnó þann 16. nóvember og var Ómar Ragnarsson heiðursgestur hennar. Mikið var um áhugaverða fyrirlestra á samkomunni. Meðal þeirra sem fluttu erindi voru fulltrúar frá Landvernd og Umhverfisstofnun auk nafnkunnra umhverfissinna eins og Andra Snæs Magnasonar.
Meira
23. nóvember 2010
Fræðsluerindi Samtaka náttúrustofa hefjast á ný
Fimmtudaginn 25. nóvember n.k. kl 12:15-12:45, flytur Gunnar Þór Hallgrímsson, líffræðingur´á Náttúrustofu Reykjaness erindi sitt: ,,Farhættir íslenskra sílamáfa".
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
22. nóvember 2010
Miðvikudaginn 24. nóvember kl. 20 mun Jörundur Svavarsson, prófessor við Háskóla Íslands, halda fyrirlestur á ráðhúsloftinu í Stykkishólmi. Fyrirlesturinn nefnist „Botndýrin lítil og stór“ en í honum fjallar Jörundur um undraveröld hafsbotnsins á Íslandsmiðum.
Fyrirlesturinn er á vegum Náttúrustofu Vesturlands, Umhverfishóps Stykkishólms og Háskólaseturs Snæfellsness. Aðgangur er ókeypis og allir velkomnir!
Sjá nánar í meðfylgjandi auglýsingu.
Meira
15. nóvember 2010
Stefán Gíslason, umhverfisstjórnunarfræðingur hjá Environice, heldur fyrirlestur á ráðhúsloftinu í Stykkishólmi, miðvikudaginn 17. nóvember kl. 20. Fyrirlesturinn nefnist „Sjálfbær – eða alla vega meðvituð – innkaup“ en þar verður fjallað um þau áhrif sem val á vörum hefur á umhverfi og samfélag og hversu mikilvægt er að neytandinn sé meðvitaður um afleiðingar vals síns.
Stórfróðlegur fyrirlestur sem á erindi við alla sem einhvern tíma kaupa eitthvað!
Sjá nánar í meðfylgjandi auglýsingu.
Smellið á myndina til að stækka hana
Hægt að er að sjá glærurnar úr fyrirlestri Stefáns með því að smella hérna.
Meira
15. október 2010
Fyrsta ársskýrsla Samtaka náttúrustofa komin út
Út er komin ársskýrsla Samtaka náttúrustofa (SNS) fyrir árið 2009. Skýrslan inniheldur umfjöllun um starfsemi náttúrustofa, sem eru sjö talsins og
dreifðar um landið. Þetta er í fyrsta sinn sem SNS
gefur út sameiginlega ársskýrslu fyrir allar náttúrustofurnar en hún sýnir svo ekki er um að
villast að á náttúrustofunum er unnið mikilvægt, fjölbreytt og áhugavert starf í tengslum við
rannsóknir, fræðslu og ráðgjöf um náttúrutengd málefni.
Skýrslan, sem er um 60 síður að lengd, er
aðgengileg á netinu, bæði á heimasíðu Samtaka náttúrustofa www.sns.is og á heimasíðum einstakra náttúrustofa. Þeim sem vilja eignast prentað eintak
af skýrslunni er bent á að hafa samband við Samtök náttúrustofa eða næstu náttúrustofu.
Meira
1. október 2010
Náttúrustofuþing 2010 á Hvolsvelli
Þriðjudaginn 12. október verður hið árlega Náttúrustofuþing haldið á Hvolsvelli. Þetta er í sjötta sinn sem náttúrustofur landsins halda opna ráðstefnu þar sem kynnt er brot af því sem unnið er að á náttúrustofunum, ásamt því sem tveir gestafyrirlesarar af samstarfsstofnunum kynna rannsóknir sínar. Þingið er haldið á Hótel Hvolsvelli, hefst kl 13:30 og stendur til 16:30.
Allir eru velkomnir og er aðgangur ókeypis.
Dagskrá Náttúrustofuþingsins er fjölbreytt og áhugaverð. Náttúrustofa Vesturlands mun kynna rannsóknir sínar á mink. Róbert A. Stefánsson og Menja von Schmalensee halda fyrirlestur um veirusjúkdóminn plasmacytosis í villtum mink.
Meira
27. ágúst 2010
Mánudaginn 23. ágúst fékk starfsfólk ráðhússins í Stykkishólmi ríflega tuttugu manna hóp tékkneskra sveitarstjórnarmanna í heimsókn. Heimsóknin var hluti af ferð hópsins um Vesturland í þeim tilgangi að
kynna sér vinnu sveitarfélaganna í fjórðungnum að umhverfismálum. Ferðin var að mestu leyti kostuð af Þróunarsjóði EFTA, en Environice átti stóran þátt í skipulagningunni hérlendis í samvinnu við Vaxtarsamning Vesturlands og ráðgjafastofuna MCN í Prag.
Tékkarnir dvöldu á Vesturlandi frá föstudegi til þriðjudags en héldu svo til síns heima eldsnemma á miðvikudagsmorgni. Í heimsókn sinni komu þeir við á ýmsum áhugaverðum stöðum á Vesturlandi eins og greint er frá í frétt á heimasíðu Environice.
Meira
16. júlí 2010
Umhverfisvottun sveitarfélaga endurnýjuð
Eins og mörgum er kunnugt hlutu sveitarfélögin fimm á Snæfellsnesi, Eyja- og Miklaholtshreppur, Grundarfjarðarbær, Helgafellssveit, Snæfellsbær og Stykkishólmsbær, ásamt Snæfellsjökulsþjóðgarði, Green Globe umhverfisvottun samfélaga árið 2008. Var svæðið fyrsta samfélagið í Evrópu til þess að hljóta slíka vottun og það fjórða í heiminum.
Vottunarmálum er þannig háttað að fullkomnun er aldrei náð og því skiptir miklu máli að sífellt sé sýnt fram á betri árangur í umhverfismálum á svæðinu. Í maí síðastliðinn komu hingað þau Cathy Colgan, margreyndur úttektaraðili, og Haukur Haraldsson frá Almennu verkfræðistofunni, og mátu það hvort samfélögin á Snæfellsnesi stæðust kröfur um endurnýjaða vottun. Samkvæmt skýrslu þeirra til EarthCheck var mælt með því að vottun fengist á ný og þann 15. júlí síðastliðinn fengu sveitarfélögin tilkynningu um að umhverfisvottunin yrði endurnýjuð, nú undir merkjum EarthCheck. Sömu vottunarsamtökin standa að vottuninni og áður og hefur hún ekki breyst efnislega, aðeins nafnið.
Meira
12. júlí 2010
Branduglunni, sem Freydís Vigfúsdóttir fann mikið slasaða eftir kríuárás fyrir tæpri viku, var sleppt í gær eftir aðhlynningu á Náttúrustofunni. Uglan var hin hressasta og frelsinu greinilega fegin. Hún flaug nokkra hringi um svæðið áður en hún hvarf sjónum.
8. júlí 2010
Síðdegis á mánudaginn var Freydís Vigfúsdóttir, doktorsnemi við Háskólasetur Snæfellsness, ásamt fylgdarliði við athuganir í kríuvarpinu
við Rif þegar hún sá kríurnar gera harða atlögu að einhverju. Í fyrstu
sást lítið til meints afræningja í
varpinu en við nánari könnun sást
að um branduglu var að ræða. Uglan var nær dauða en lífi eftir árásina en Freydís tók hana með sér á Náttúrustofuna til aðhlynningar.
Eftir hvíld og að hafa rifið í sig tvo hrossagauka sem fundust í frysti Náttúrustofunnar er uglan nú mun hressari. Henni verður sleppt aftur
við Rif þegar hún hefur náð fullum bata.
Meira
7. júlí 2010
Aðgerðir gegn ágengum plöntum í Stykkishólmi ganga ágætlega og er lúpínuslætti að ljúka. Fyrstu yfirferð á skógarkerfil og spánarkerfil er lokið nema í örfáum tilfellum þar sem ekki fékkst leyfi til að fara inn í garða. Sömuleiðis vantar enn leyfi nokkurra garðeigenda til að fjarlægja bjarnarkló og lúpínu.
Að kvöldi 21. júní síðastliðinn komu íbúar við Ytri-Höfða saman og slógu lúpínu. Þátttakan var góð og gekk slátturinn frábærlega í veðurblíðu. Yfirbragð höfðans breyttist mikið við sláttinn. Eiga íbúarnir hrós skilið fyrir að eiga frumkvæði að aðgerðum sveitarfélagsins gegn ágengum plöntum og að leggja vinnu sína í aðgerðirnar. Meira
5. júlí 2010
Tilraunalandið - Vísindin lifna við
Náttúrustofan vill vekja athygli á farandsýningu um náttúruvísindi sem verður í Stykkishólmi á morgun þann 6. júlí.
Smellið á auglýsinguna hér fyrir neðan til að sjá hana stærri.
23. júní 2010
Nú stendur yfir verkefni Stykkishólmsbæjar
og Náttúrustofu Vesturlands um aðgerðir
gegn ágengum plöntutegundum í landi sveitarfélagsins. Lúpínusláttur hófst í síðustu viku, en aðgerðir gegn lúpínu eru líklegastar
til að skila árangri þegar plantan er í fullum blóma. Almennt er ekki gert ráð fyrir að fjarlægja plönturnar eftir slátt, þar sem talið
er að plöntuleifarnar geti veitt vörn gegn því
að t.d. fíflar og njóli sái sér inn á slegnu
svæðin. Að auki mynda plöntuleifarnar lífrænt lag á yfirborði, sem dregur úr frostverkun og auðveldar framvindu annars gróðurs.
Í samstarfi við Landgræðslu ríkisins og Landbúnaðarháskóla Íslands verða gerðar tilraunir um árangur mismunandi aðgerða
gegn lúpínu. Í þeim tilgangi verða afmarkaðir nokkrir 5x20 m reitir í lúpínubreiðum
norðaustur af skógræktarsvæðinu við Grensás, þar sem borin verða saman áhrif sláttar, eitrunar og engra aðgerða. Útivistarfólk getur því átt von á að sjá þar merkta staura sem afmarka svæðin. Tilraunirnar munu auðvelda ákvarðanatöku um framhald aðgerða, bæði hér í Stykkishólmi og á landsvísu.
Meira
14. júní 2010
Á vegum Stykkishólmsbæjar eru nú hafnar aðgerðir gegn ágengu plöntunum skógarkerfli og spánarkerfli. Kerflarnir, sem gjarnan mynda með tímanum samfelldar
breiður sækja í næringarríkan jarðveg, þar á meðal lúpínubreiður, og dreifa
sér ört á eigin spýtur. Þeir eru taldir ógn við líffræðilega fjölbreytni því fáar aðrar plöntur þrífast í skugga þeirra.
Aðgerðir gegn þeim eru dýrari og erfiðari eftir því sem plönturnar eru útbreiddari, auk þess sem tap á náttúrulegu gróðurfari verður meira. Stykkishólmsbær er fyrsta sveitarfélagið á Íslandi til að hefja slíkar aðgerðir í heilu sveitarfélagi.
Tveir menn vinna nú í fullu starfi við aðgerðir gegn ágengum plöntum í Stykkishólmi og hafa þegar þetta er ritað slegið eða stungið upp kerflana alls staðar utan garða og í görðum þar sem samþykki eiganda hefur fengist. Eigendur garða þar sem enn er að finna kerfil eru vinsamlegast beðnir um að hafa samband við Hlyn í s. 864-5547 eða undirritaðan.
Meira
8. júní 2010
Kraftur í náttúrurannsóknum í Stykkishólmi í sumar
Um vor og sumar er aðaltíminn til gagnaöflunar í náttúrurannsóknum og þetta árið er mikið um að vera hjá Náttúrustofu Vesturlands og Háskólasetri Snæfellsness.
Á Náttúrustofu Vesturlands eru fjórir fastráðnir starfsmenn í fullu starfi, sem m.a. sinna rannsóknum á spendýrum, fuglum og plöntum og vinna að umhverfismálum, auk þess sem danskur sérfræðingur Norrænu eldfjallastöðvarinnar hefur þar starfsaðstöðu hluta af sínum vinnutíma. Í vor og sumar sinna þrír verkefnaráðnir starfmenn afmörkuðum verkefnum um mink, glókoll og tófu. Í sumar verður hér einnig doktorsnemi á styrk frá Rannís vegna minkarannsókna og líffræðinemi, sem fékk styrk til að vinna að rannsóknum á verkun þara á vegum Matís og Íslenskrar bláskeljar ehf. og hafa mun vinnuaðstöðu m.a. á Náttúrustofunni. Þá er ótalinn einn sjálfboðaliði sem verður hér við ýmsar rannsóknir í júlí.
Meira
1. júní 2010
Teymi sérfræðinga kemur að aðgerðum gegn ágengum plöntum
Náttúrustofa Vesturlands hefur fengið helstu sérfræðinga landsins um landgræðslu og ágengar plöntur til liðs við sig í samstarfsverkefni sínu við Stykkishólmsbæ um aðgerðir gegn ágengum plöntum í bæjarlandinu.
Þann 20. maí síðastliðinn stóð Náttúrustofan fyrir sérfræðingafundi í Stykkishólmi þar sem 7 sérfræðingar
frá Náttúrufræðistofnun Íslands, Landgræðslu ríkisins, Landbúnaðarháskóla Íslands og Háskóla Íslands vörðu einum degi til að skoða aðstæður og veita ráðgjöf.
Allar þessar stofnanir munu leggja verkefninu lið með áframhaldandi ráðgjöf en einnig munu Landgræðslan og Landbúnaðarháskólinn taka þátt í að mæla árangur mismunandi aðferða, Náttúrufræðistofnun mun leggja til greiningu á loftmyndum og Háskólinn mun standa fyrir rannsóknum á félagslegum þáttum.
Meira
26. apríl 2010
Jón Sólmundsson, fiskifræðingur á Hafrannsóknastofnuninni, áður útibússtjóri stofnunarinnar í Ólafsvík, flytur erindi um skötusel
og lifnaðarhætti hans næstkomandi þriðjudag.
Sjómenn við sunnanverðan Breiðafjörð hafa í
síauknum mæli orðið varir við skötusel á síðustu
árum, enda er tegundin ein þeirra sem breytt hafa
útbreiðslu sinni á Íslandsmiðum á síðustu árum.
Fyrirlesturinn, sem er á vegum Náttúrustofu Vesturlands og Háskólaseturs Snæfellsness, verður þriðjudaginn 27. apríl kl. 20 á ráðhúsloftinu,
Hafnargötu 3 í Stykkishólmi.
Meira
Vel heppnuð ráðstefna um umhverfismál og vottun Vestfjarða
Um síðustu helgi héldu Ferðamálasamtök Vestfjarða ráðstefnu að Núpi við Dýrafjörð til að vekja athygli á mikilvægi umhverfismála og umhverfisvottana. Fyrirlesarar voru umhverfisráðherra, sérfræðingar um umhverfismál, þ.á m. tveir fulltrúar Náttúrustofu Vesturlands, auk fulltrúa fyrirtækja og sveitarfélaga.
Ráðstefnan var mjög vel heppnuð og gestir nálægt 100.
„Ég hef á tilfinningunni að ráðstefnan hafi þegar gert það gagn að nú verði ekki aftur snúið í þessum málum og ég er mjög bjartsýnn á að Vestfirðingar séu tilbúnir að ræða þessi mál af alvöru og hrinda þeim í framkvæmd,“ sagði Sigurður Atlason, formaður Ferðamálasamtaka Vestfjarða, um ráðstefnuna í viðtali við BB (sjá http://www.bb.is/Pages/26?NewsID=147286).
Ráðstefnuhefti með útdráttum erinda má finna hér eða með því að smella á myndina fyrir ofan.
Meira
12. apríl 2010
Umhverfismál og vottun Vestfjarða
Laugardaginn 17. apríl standa Ferðamálasamtök Vestfjarða fyrir afar áhugaverðri ráðstefnu í Dýrafirði. Ráðstefnan ber yfirskriftina „Umhverfisvottun Vestfjarða“ en þar munu sérfræðingar víða að fjalla um ýmislegt er snýr að umhverfismálum. Á meðal fyrirlesara eru þrír Snæfellingar, þar af tveir starfsmenn Náttúrustofu Vesturlands. Róbert A. Stefánsson mun fjalla um umhverfisvottun Snæfellsness, hvað hún felur í sér og hverju hún hefur skilað en Menja von Schmalensee fjallar um framtíðarsýn um umhverfisvottað Ísland. Erla Friðriksdóttir, bæjarstjóri í Stykkishólmi, mun fjalla um reynslu Stykkishólmsbæjar af frumkvöðlastarfi á sviði umhverfismála.
Ráðstefnan verður haldin á Hótel Núpi í Dýrafirði og hefst kl. 11, laugardaginn 17. apríl. Allir eru velkomnir. Meira
22. mars 2010
Fyrirlestur SNS í fjarfundabúnaði: Uppeldisstöðvar þorskseiða
Fimmtudaginn 25. mars, kl. 12:15 - 12:45, flytur Guðbjörg Ásta Ólafsdóttir, líffræðingur á Rannsóknarsetri Háskóla Íslands á Vestfjörðum, erindi sitt:
Uppeldisstöðvar þorskseiða.
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
22. mars 2010
Umsóknarfrestur rennur út í dag
Minnt er á að umsóknarfrestur um starf umhverfisfulltrúa Snæfellsness er að renna út. Í einni af þeim auglýsingum sem birtust fyrir nokkru misritaðist umsóknarfrestur en hið rétta er að hann rennur út í dag, mánudaginn 22.
mars. Auglýsinguna í heild sinni má finna hér.
12. mars 2010
Úrslitatilraun til að bjarga erni
Í fyrrakvöld sagði Stöð 2 frá skurðaðgerð sem framkvæmd var á haferni á dýraspítalanum í Víðidal. Örninn hefur verið í umsjá Húsdýragarðsins og Náttúrufræðistofnunar undanfarna mánuði.
Fuglinn var merkur sem ungi á hreiðri á Mýrum sumarið 2004 en heimilisfólkið í Bjarnarhöfn á norðanverðu Snæfellsnesi fann hann laskaðan við Bjarnarhafnarfjall undir lok september í fyrra. Starfsmenn Náttúrustofu Vesturlands sóttu fuglinn og komu honum í hendur Kristins Hauks Skarphéðinssonar, arnarsérfræðings Náttúrufræðistofnunar Íslands. Farið var með fuglinn í skoðun á dýraspítalann í Víðidal þar sem í ljós kom vökvafyllt kýli við vænglið, sem var tæmt og hreinsað. Undanfarna rúma fimm mánuði hefur örninn svo dvalið í Húsdýragarðinum án þess að sýna umtalsverðar framfarir. Því var ákveðið að láta dýralækni gera úrslitatilraun til að hjálpa erninum. Liðurinn var enn bólginn og við röntgenmyndun kom í ljós það sem virtist vera aðskotahlutur í liðnum. Skorið var á kýlið og liðurinn hreinsaður.
Meira
9. mars 2010
Fyrirlestur: Landgræðsla – leiðindi eða líkn við landið?
Kristín Svavarsdóttir, plöntuvistfræðingur hjá Landgræðslu ríkisins, fjallar um gróðurframvindu og stýringu á henni við uppgræðslu lands.
Á síðari árum hefur áhersla á vistheimt orðið æ stærri þáttur í landgræðslu bæði hér á landi og alþjóðlega. Vistheimt og framvinda eru nátengd. Með framvindu er átt við stefnubundna breytingu á tegundum og undirlagi yfir tíma óháð árstíð en vistheimt er einmitt markviss stýring á slíkri breytingu. Í fyrirlestrinum verður fjallað um efnið og niðurstöður rannsókna Kristínar og samstarfsfólks fléttaðar inn.
Fyrirlesturinn, sem er á vegum Náttúrustofu Vesturlands, Umhverfishóps Stykkishólms og Háskólaseturs Snæfellsness, verður fimmtudaginn 11. mars kl. 20 á ráðhúsloftinu, Hafnargötu 3 í Stykkishólmi.
Allir velkomnir. Aðgangur ókeypis.
Smellið á myndina til að sjá hana stærri
5. mars 2010
Auglýst eftir umhverfisfulltrúa
Náttúrustofa Vesturlands í Stykkishólmi auglýsir eftir umhverfisfulltrúa til að sinna umhverfismálum sveitarfélaganna fimm á Snæfellsnesi. Um er að ræða 100% stöðu, sem felur í sér vinnu að og umsjón með sjálfbærnivottun Snæfellsness (sjá www.nesvottun.is og www.earthcheck.org). Um er að ræða krefjandi og fjölbreytt starf sem getur falið í sér tækifæri til að hafa víðtæk áhrif á sviði umhverfismála.
Leitað er eftir kraftmiklum, drífandi, jákvæðum og samviskusömum einstaklingi með mikinn áhuga á umhverfismálum, sem hefur góða samskiptahæfni og getur unnið sjálfstætt.
Umsækjandi þarf að hafa lokið háskólanámi í umhverfisfræði eða náttúrufræði. Framhaldsmenntun á háskólastigi er æskileg. Færni í að miðla upplýsingum á rituðu og töluðu máli og góð enskukunnátta er nauðsynleg.
Meira
22. febrúar 2010
Fyrirlestur SNS í fjarfundabúnaði: Hnyðlingar í íslenskum gosmyndunum
Fimmtudaginn 25. febrúar, kl. 12:15 - 12:45, flytur Ingvar Atli Sigurðsson, jarðfræðingur á Náttúrustofu Suðurlands, erindi sitt:
Hnyðlingar í íslenskum gosmyndunum.
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
19. febrúar 2010
Lísa Anne Libungan, sjávarlíffræðingur frá Háskóla Íslands og Matís, heldur fyrirlestur um nýlegar rannsóknir sínar á aðlögun þorsks að umhverfi sínu.
Þorskurinn við Ísland býr við breytileg umhverfisskilyrði sem einkennast af áhrifum kaldsjávar norður af landinu en hlýrri sjávar við suðurströndina. Munur er á vexti, lifun og súrefnisupptöku þorsks frá norður- og suðursvæði, sem gefur til kynna að stofngerð þorsks við Ísland sé flóknari en margan grunar.
Fyrirlesturinn, sem er á vegum Háskólaseturs Snæfellsness og Náttúrustofu Vesturlands, verður þriðjudaginn 23. febrúar kl. 20 á ráðhúsloftinu, Hafnargötu 3 í Stykkishólmi.
Allir velkomnir. Aðgangur ókeypis
Smellið á myndina til að sjá hana stærri
25. janúar 2010
Fræðsluerindi náttúrustofa í fjarfundarbúnaði: Æðarfugl - Gerð og samsetning ungahópa
Fimmtudaginn 28. janúar nk. kl 12:15-12:45 flytur Rán Þórarinsdóttir, líffræðingur á Náttúrustofu Austurlands, erindi sitt um gerð og samsetningu æðarfuglaungahópa. Erindinu verður varpað vítt og breitt um landið. Í Stykkishólmi er hægt að fylgjast með erindinu í námsverinu í Egilshúsi og á Hvanneyri í Landbúnaðarháskólanum (Vesturstofu í Ásgarði). Allir velkomnir.
19. janúar 2010
Miðvikudaginn 20. janúar kl. 20 mun Freydís Vigfúsdóttir, líffræðingur á Háskólasetri Snæfellsness, fjalla um
kríur á Snæfellsnesi í fyrirlestri á lofti ráðhússins í Stykkishólmi.
Frá 2005 hefur varpárangur hjá mörgum sjófuglategundum verið áberandi lélegur. Krían er sérstaklega viðkvæm fyrir umhverfisbreytingum en verkefni
Freydísar er að meta áhrif breytilegs umhverfis á kríur. Undanfarin tvö ár hefur hún stundað rannsóknir í snæfellskum kríuvörpum og mun í fyrirlestrinum greina frá helstu niðurstöðum rannsóknarinnar sem fyrir liggja.
Smellið á meðfylgjandi mynd til að skoða auglýsingu um atburðinn. Meira
8. janúar 2010
Nú er lokið árlegri talningu vetrarfugla sem fer fram í kringum áramót. Að þessu sinni voru fuglar taldir mun víðar á Snæfellsnesi en áður (sjá meðfylgjandi kort).
Á talningarsvæðunum voru samtals um 20 þúsund fuglar af 33 tegundum. Fuglalífið var óvenju blómlegt líkt og síðasta vetur, að líkindum vegna mikillar síldargengdar í Breiðafirði annan veturinn í röð. Algengasti fuglinn var æðarfugl en þar á eftir komu hvítmáfur og svartbakur. Í töflu hér fyrir neðan má sjá
10 algengustu fuglategundirnar. Meira
21. desember 2009
Jólakveðja frá Náttúrustofu Vesturlands
Starfsfólk Náttúrustofu Vesturlands óskar samstarfsfólki, viðskiptavinum, velunnurum, Vestlendingum og landsmönnum öllum gleðilegra jóla og farsældar á komandi ári. Vinsamlegast smellið á meðfylgjandi mynd.
14. desember 2009
Vel heppnaðar loftslagskertavökur um allan heim
Áætlað er að mörg hundruð þúsund manns hafi mætt á meira en 3.200 loftslagskertavökur í 139 löndum, sem haldnar voru síðastliðinn laugardag, 12. desember, til að hvetja ráðamenn heimsins, sem funda á loftslags-ráðstefnunni í Kaupmannahöfn, til að gera sanngjarnan, metnaðarfullan og bindandi samning um losun gróðurhúsalofttegunda. Meira en 11 milljónir jarðarbúa hafa skrifað undir yfirlýsingu um að vera tilbúinir fyrir raunverulegar aðgerðir gegn loftslagsbreytingum af mannavöldum (sjá www.tcktcktck.org). Í gær, 13. desember hringdu kirkjuklukkur um allan heim, þ.á.m. í Stykkishólmi, 350 sinnum til að vekja athygli á því að styrkur koltvíoxíðs í andrúmslofti er ekki talinn mega vera hærri en 350 hlutar úr milljón til að athafnir manna hafi ekki alvarleg áhrif á loftslag jarðar. Styrkurinn er nú um 390 og fer ört hækkandi.
Á Íslandi voru skráðar kertasamkomur í Stykkishólmi, Borgarnesi og Reykjavík. Samkomunni í Reykjavík var frestað til þriðjudags vegna veðurs en Vestlendingar létu rigningu og rok ekki aftra sér. Hólmarar voru með fjölmennustu kertavöku landsins, þar sem 25 manns mættu og áttu góða stund saman. Meira
9. desember 2009
Metþátttaka í alþjóðlegri loftlagsvöku?
Laugardaginn 12. desember kl. 17 standa Umhverfishópur Stykkishólms og Náttúrustofa Vesturlands fyrir samverustund í Hólmgarði, Stykkishólmi, til að hvetja leiðtoga heimsins á loftslagsráðstefnunni í Kaupmannahöfn til að gera sanngjarnan, metnaðarfullan og bindandi samning um aðgerðir til að draga úr loftslagsbreytingum af mannavöldum.
Uppákoman er hluti af alþjóðlegum viðburði sem umhverfis- og mannréttindasamtök o.fl. undir regnhlífinni TckTckTck standa fyrir í öllum heimshornum þennan dag. Vonir standa til að viðburðurinn verði einn sá allra stærsti til þessa um loftslagsmál, en þegar þetta er ritað eru 2.227 samkomur í 132 löndum þegar komnar á skrá og eiga þessar tölur eflaust eftir að hækka. Á Íslandi eru skráðar samkomur í Stykkishólmi, Borgarnesi og Reykjavík.
Meira
4. desember 2009
Í nóvember kynnti Náttúrustofa Vesturlands tillögu sína um að umhverfisvotta Ísland. Hugmyndin hefur vakið nokkra athygli og jákvæða umfjöllun í öllum helstu fjölmiðlum landsins.
Greinargerðin um umhverfisvottun Íslands var send til allra þingmanna og auk þess valinna aðila víða um land. Á næstu dögum verður hún send til forsvarsmanna sveitarfélaga um land allt.
Í höfuðstöðvum Green Globe í Ástralíu hefur hugmyndin einnig vakið athygli og fengið jákvæðar undirtektir. Hafa forsvarsmenn þeirra m.a. sýnt því áhuga að ræða við íslenska ráðamenn um útfærslur hugmyndarinnar. Meira
4. desember 2009
Metnaðarfullan, bindandi og sanngjarnan samning í Kaupmannahöfn
Laugardaginn 12. desember kl. 17 standa Umhverfishópur Stykkishólms og Náttúrustofa Vesturlands fyrir samverustund í Hólmgarði, Stykkishólmi, til að vekja athygli á mikilvægi Kaupmannahafnarfundarins, ráðstefnu
Sameinuðu þjóðanna um loftslagsbreytingar, sem fram fer dagana 7.-18. desember. Í boði verður heitur jóladrykkur og piparkökur í húsi kvenfélagsins. Þátttakendur eru hvattir til að taka með sér kerti og/eða kyndla og góða skapið. Allir eru hjartanlega velkomnir.
Uppákoman er hluti af alþjóðlegum viðburði sem umhverfis- og mannréttindasamtök o.fl. undir regnhlífinni TckTckTck standa fyrir í öllum heimshornum þennan dag.
(sjá http://tcktcktck.org/realdeal).
Vonir standa til að viðburðurinn verði einn sá allra stærsti til þessa um loftslagsmál, en um 1.000 samkomur eru þegar komnar á skrá í
90 löndum og mun eflaust fjölga til muna
þegar nær dregur. Meira
24. nóvember 2009
Glókollur – örsmár konungur fuglanna
Róbert A. Stefánsson og Menja von Schmalensee, Náttúrustofu Vesturlands,
halda fyrirlestur á vegum Náttúrustofunnar og Umhverfishóps Stykkishólms á ráðhúsloftinu, fimmtudaginn 26. nóvember kl. 20.
Glókollur er einn af nýlegum landnemum á Íslandi. Hann er minnsti varpfugl í Evrópu, staðfugl, étur skordýr og heldur til í barrskógum. Náttúrustofa Vesturlands hefur fylgst með útbreiðslu glókollsins á Vesturlandi frá árinu 2003. Fjallað verður almennt um glókollinn og lifnaðarhætti hans, hvernig útbreiðsla hans hefur þróast og hvers vegna hann er nefndur fuglakóngur í Skandinavíu.
Allir velkomnir. Aðgangur ókeypis
Smellið á myndina til að sjá hana í hærri upplausn
24. nóvember 2009
Á vísindavöku, sem haldin var af hópnum W23 þann 14. nóvember síðastliðinn í Félagsheimilinu Klifi, var gestum boðið að taka þátt í getraun. Verðlaun voru tvö eintök af bókinni Ströndin í náttúru Íslands, árituð af höfundi, Guðmundi Páli Ólafssyni. Dregið var úr réttum svörum og upp komu nöfn tveggja 8 ára barna, þeirra Jönu Hermannsdóttur og Gylfa Örvarssonar. Myndin var tekin við afhendingu verðlaunanna. Aðstandendur vísindavökunnar óska þeim til hamingju með vinningana og þakka þeim og öðrum fyrir þátttökuna.
W23 er samstarf fimm náttúrutengdra stofnana á Snæfellsnesi sem efla vilja náttúruvísindi: Háskólaseturs Snæfellsness, Náttúrustofu Vesturlands, útibús Hafrannsóknastofnunarinnar í Ólafsvík, Varar, sjávarrannsóknarseturs við Breiðafjörð og Þjóðgarðsins Snæfellsjökuls. Samstarfið er styrkt af Vaxtarsamningi Vesturlands.
Gylfi Örvarsson og Jana Hermannsdóttir við afhendingu verðlaunanna.
(Myndina tók Erla Björk Örnólfsdóttir)
23. nóvember 2009
Fyrirlestur SNS í fjarfundabúnaði: Fuglalíf á votlendissvæðum Skagafjarðar
Fimmtudaginn 26. nóvember, kl. 12:15 - 12:45, flytur Þórdís Vilhelmína Bragadóttir, líffræðingur á Náttúrustofu Norðurlands vestra, erindi sitt: Fuglalíf á votlendissvæðum Skagafjarðar
Í Stykkishólmi er hægt að fylgjast með erindinu í Egilshúsi og á Hvanneyri í Landbúnaðarháskólanum (Vesturstofu í Ásgarði).
Nánar má lesa um fræðsluerindi Náttúrustofa og á hvaða stöðum hægt er að fylgjast með þeim með því að smella á auglýsinguna hér fyrir neðan.
12. nóvember 2009
Hólmarar á Líffræðiráðstefnunni 2009
Hluti af rannsóknum Háskólaseturs Snæfellsness (HS) og Náttúrustofu Vesturlands (NSV) var kynntur á stórri ráðstefnu um líffræðirannsóknir á Íslandi, sem haldin var í Reykjavík 6.-7. nóvember í tilefni af 30 ára afmæli Líffræðifélags Íslands og 35 ára afmæli Líffræðistofnunar Háskólans. Ráðstefnan var feykivel sótt en þar voru fjölbreyttar rannsóknir kynntar í 105 erindum og á 110 veggspjöldum. Meira
11. nóvember 2009
Verður Ísland fyrsta umhverfisvottaða land heims?
Í nýrri greinargerð Náttúrustofu Vesturlands er fjallað um þann möguleika að umhverfisvotta Ísland. Með henni er athygli vakin á nýstárlegri og raunhæfri leið til að byggja upp ímynd landsins og styrkja á sama tíma ferðaþjónustu, útflutningsgreinar og sjálfbæra þróun.
Ísland yrði fyrsta umhverfisvottaða landið í heiminum, sem markaði því sérstöðu sem á sér engin fordæmi.
Greinargerðina í heild sinni má nálgast með því að smella á myndina hér til hægri.
10. nóvember 2009
Laugardaginn 14. nóvember býður W23-hópurinn til Vísindavöku í Ólafsvík kl. 13:00-15:30. Margt áhugavert verður á boðstólum og eru allir velkomnir. Nánari upplýsingar má sjá með því að smella á meðfylgjandi auglýsingu.
W23 er heiti samstarfs náttúrutengdra stofnana á Snæfellsnesi. Stofnanirnar eru Náttúrustofa Vesturlands, Háskólasetur Snæfellsness, Vör Sjávarrannsóknarsetur, útibú Hafrannsóknastofnunarinnar í Ólafsvík og Þjóðgarðurinn Snæfellsjökull.
Smellið á myndina hér fyrir neðan fyrir nánari upplýsingar.
28. október 2009
Fræðsluerindi náttúrustofa hefjast á ný:
Fiðrildi fylla Jökulsárgljúfur
21. október 2009
Ágengar plöntur í Stykkishólmi
Náttúrustofa Vesturlands hefur gefið út skýrsluna „Ágengar plöntur í Stykkishólmi – útbreiðsla alaskalúpínu, skógarkerfils, spánarkerfils og bjarnarklóar og tillögur um mótvægisaðgerðir“. Skýrslan er unnin að frumkvæði Stykkishólmsbæjar en varð að samvinnuverkefni bæjarins og Náttúrustofunnar.
Ljóst er að ágengar tegundir geta haft veruleg neikvæð áhrif á líffræðilega fjölbreytni. Áætlað er að á heimsvísu megi nú finna a.m.k. 100-550 þúsund tegundir plantna og dýra sem lifa utan náttúrulegra heimkynna sinna og er talið að allt að 80% tegunda á alþjóðlegum válistum séu þar vegna neikvæðra áhrifa innfluttra tegunda. Meira
1. október 2009
Náttúrustofuþing 2009 í Sandgerði
1. október 2009
Laskaður örn undir læknishendur
26. ágúst 2009
Stjórnun strandsvæða
24. ágúst 2009
Nýr starfsmaður á Náttúrustofunni
6. júlí 2009
Litfögur fiðrildi
25. júní 2009
Erni sleppt í gær
23. júní 2009
Fjölbreytt og skemmtilegt skrifstofustarf
23. júní 2009
Örn endurheimtist í Skessuhorninu
16. júní 2009
Grútarblautur örn
3. júní 2009
Vogmey rak á fjöru í Stykkishólmi
2. júní 2009
Vísindamenn framtíðar aðstoðuðu við rjúpnatalningu
29. apríl 2009
Kynning á Eldfjallasafni í Stykkishólmi
27. apríl 2009
Fræðsluerindi í fjarfundarbúnaði: Athuganir á Dýra- og Önundarfirði fyrir og eftir þverun
14. apríl 2009
Kynning á nýrri gönguleið eftir Snæfellsnesfjallgarði
26. mars 2009
Fyrirlestur - Milli lands og Eyja
26. mars 2009
Fræðsluerindi í fjarfundarbúnaði: Glókollur á Vesturlandi
17. mars 2009
Hellar eru auðlind - fræðslufundur
23. febrúar 2009
Fræðsluerindi í fjarfundarbúnaði: Áhrif bogkrabba og nákuðungs á hrúðurkarl og krækling í fjörum
17. febrúar 2009
Fyrirlestur um pokadýr í Ástralíu
3. febrúar 2009
Doktorsnemum fjölgar á Náttúrustofunni
28. janúar 2009
Fræðsluerindi í fjarfundarbúnaði
21. janúar 2009
Fyrirlestur um brandendur
7. janúar 2009
Metfjöldi fugla í vetrarfuglatalningu NSV
Náttúrustofa Vesturlands, Hafnargötu 3, 340 Stykkishólmi, s. 433-8121, Gsm 898-6638, NMT 855-0922, Fax 438-1705, nsv@nsv.is
