16. júní 2009

Grútarblautur örn

Ferðafólk í útilegu tilkynnti lögreglunni á Snæfellsnesi um örn í vanda í Nátthaga við Berserkjahraun seint síðastliðið föstudagskvöld. Starfsmaður Náttúrustofunnar mætti á staðinn og handsamaði örninn, sem reyndist vera grútarblautur. Grúturinn eyðileggur einangrunargildi fiðursins og gerir fuglinum jafnframt erfitt um flug.

Fuglinn bar merki og hafði verið merktur sem ungi á eyju í Hvammsfirði árið 2008.

Hann var fluttur til Borgarness, þar sem Kristinn Haukur Skarphéðinsson, starfsmaður Náttúrufræðistofnunar, tók við honum og flutti áfram í Húsdýragarðinn í Reykjavík til aðhlynningar. Þar verður fiðrið þvegið og vonandi kemst fuglinn aftur til síns heima innan skamms.

Smellið á myndirnar til að skoða þær betur.

 

Til baka á fréttasíðu