13. desember 2010

Tvær nýjar yfirlitsgreinar um ágengar tegundir birtar í Náttúrufræðingnum

Í síðustu viku birtist í Náttúrufræðingnum, tímariti Hins íslenska náttúrufræðifélags (HÍN), seinni greinin af tveim um ágengar tegundir eftir Menju von Schmalensee, sviðsstjóra á Náttúrustofu Vesturlands. Fyrri greinin birtist í næsta tölublaði á undan, sem út kom í sumar.

Ágengar tegundir eins og lúpína og minkur hafa verið fyrirferðarmiklar í umræðu landsmanna síðustu áratugi en í greinunum tveim er litið á ágengar tegundir í stóru samhengi. Í þeirri fyrri er fjallað almennt um líffræði þeirra og stöðu á heimsvísu en sjónum beint að stöðu mála á Íslandi í seinni greininni.

Greinarnar gefa greinargott yfirlit um málaflokkinn og eru afrakstur margra mánaða ítarlegrar heimildavinnu. Efnið hefur aldrei áður verið tekið saman á þennan hátt á íslensku og er vonast til að greinarnar stuðli að málefnalegri umræðu um framandi, ágengar tegundir hér á landi. Alþjóðastofnanir og samtök telja ágengar tegundir vera á meðal mestu ógna við líffræðilega fjölbreytni á heimsvísu og fer því vel á að greinarnar birtist einmitt á ári líffræðilegrar fjölbreytni. Náttúrustofan hefur m.a. staðið fyrir rannsóknum á ágengu tegundunum mink og lúpínu.

Náttúrufræðingurinn er vandað náttúruvísindarit fyrir jafnt fræðimenn og almenning og er aðgengilegt á bókasöfnum en félagsaðild í HÍN felur m.a. í sér áskrift að tímaritinu. Greinarnar tvær eru ekki aðgengilegar á netinu en útdrætti úr greinunum má nálgast á neðangreindum vefslóðum. Þá má einnig nálgast afrit af greinunum hjá höfundi (menja@nsv.is).

 

Vágestir í vistkerfum – fyrri hluti. Stiklað á stóru um framandi ágengar tegundir. Náttúrufræðingurinn 80 (1-2), bls. 15-26.
Útdráttur: http://www.hin.is/resultpage.asp?ID=2759

Vágestir í vistkerfum – Seinni hluti. Framandi og ágengar tegundir á Íslandi. Náttúrufræðingurinn 80 (3-4), bls. 84-102.
Útdráttur: http://www.hin.is/resultpage.asp?ID=2760

 

Deila

 

Náttúrustofa Vesturlands, Hafnargötu 3, 340 Stykkishólmi, s. 433-8121, Gsm 898-6638, NMT 855-0922, Fax 438-1705, nsv@nsv.is

 

Til baka á fréttasíðu